O proxecto bautizado como “Recuperación del sistema dunar en la playa de Samil”, promovido polo Ministerio para a Transición Ecolóxica e executado pola empresa Narom, está a cometer un dos maiores atentados ambientais recentes no litoral vigués. Lonxe de recuperar o ecosistema dunar, estase destruíndo un espazo protexido de 8,5 hectáreas incluído no Plan de Ordenación do Litoral (POL) da Xunta de Galicia.
🔍 Que está pasando realmente?
Segundo o informe do xeólogo Óscar Pazos, encargado por Ecoloxistas Galiza Atlántica e Verde, as obras están:
- Apisonando e remexendo os sedimentos naturais con maquinaria pesada.
- Cimentando e empedrando a área que debía rexenerarse.
- Construíndo pistas e valados artificiais que impiden o movemento natural das areas.
- Alterando gravemente a topografía e xerando enxurradas e lameiros.
- Plantando árbores e mesmo unha palmeira, fixando a area cando debería permanecer móbil.
💸 Un simulacro de recuperación por 4,1 millóns de euros
Mentres se destrúe o campo dunar natural, constrúese un decorado artificial de apenas 1.000 m² no alto da praia, unha “reserva natural de xoguete” valada e ben visible para o público, usada como coartada mediática. Todo por 4.100.000 euros públicos, a razón de 4.000 euros por metro cadrado.
📢 Denuncias presentadas
A Asociación Ecoloxistas en Acción Galiza xa formalizou denuncias ante:
O Concello de Vigo.
O Ministerio para a Transición Ecolóxica (Dirección Xeral de Costas).
O SEPRONA da Garda Civil.
A Dirección Xeral de Calidade Ambiental da Xunta de Galicia.
A Axencia de Protección da Legalidade Urbanística (APLU).
📣 Non é unha rexeneración. É un espectáculo de prestidixitación urbanística.
Esta obra non responde a un erro técnico, senón a unha estratexia deliberada de “greenwashing”, un simulacro verde para tapar un modelo de cidade baseado na destrución, a privatización e o beneficio para uns poucos. A verdadeira rexeneración non precisa máis cemento, senón deixar actuar ao mar e ao vento.
🛑 Exiximos a paralización inmediata das obras, a restauración do ecosistema afectado e unha revisión íntegra do proxecto.
A defensa de Samil é a defensa do noso patrimonio natural. É tempo de dicir basta á burla verde.
OPINIÓN.- Burla verde en Samil. O greenwashing Caballero