🎯 Novo freo xudicial ao polígono industrial eólico “Outeiro Grande”: o Tribunal Supremo inadmite os recursos da Xunta e da promotora Outeiro Rubio S.L.U.
O Tribunal Supremo vén de inadmitir os recursos de casación presentados pola Xunta de Galicia e pola empresa promotora Outeiro Rubio S.L.U. contra a medida cautelar que suspende a autorización do polígono industrial eólico “Outeiro Grande”, proxectado nos concellos da Estrada e Forcarei.
Esta suspensión fora acordada polo TSXG tras o recurso presentado por Ecologistas en Acción Galicia, fronte ao silencio administrativo da Xunta ante o seu recurso de alzada pola autorización outorgada o 16 de maio de 2023 pola Dirección Xeral de Planificación Enerxética e Recursos Naturais.
🔍 Por que se inadmiten os recursos?
O Tribunal Supremo considera que nin a Xunta nin a empresa xustificaron de forma concreta:
A existencia dun interese casacional obxectivo que fixese necesaria a intervención do Supremo.
A suposta contradicción con outras resolucións xudiciais.
O posible perxuízo aos intereses xerais, xa que as súas alegacións eran vagas e sen análise concreta.
📌 Tamén sinala que a decisión recorrida do TSXG baséase en valoracións específicas das circunstancias do caso, especialmente sobre o risco de continuar co proxecto mentres se resolve o fondo do litixio (“periculum in mora”).
💶 Como consecuencia, impóñense as costas procesuais ás dúas partes recorrentes, cun límite de 500 euros para cada unha, a favor da parte gañadora.
⚠️ Unha vez máis, a Xunta de Galicia sitúase do lado dos intereses empresariais, defendendo en sede xudicial os proxectos das promotoras en lugar de protexer os dereitos e as demandas da sociedade civil. En vez de exercer un papel garante do interese público e do ben común, actúa como aliada das empresas eólicas, mesmo cando os tribunais recoñecen a existencia de riscos que aconsellan deter os proxectos ata unha resolución definitiva. Esta actitude é profundamente preocupante e evidencia a urxencia de revisar a política enerxética da Xunta á luz da transparencia, a participación social e a defensa do territorio.
📄 Máis información no documento oficial:
