NOTA
O venres 7 de febreiro Ecoloxistas Galiza Atlántica e Verde organiza en Pontevedra unha xornada sobre a actualidade do proceso de transición enerxética, coa colaboración do Concello de Pontevedra e a Asociación Cultural Sondexeve.
Na tarde dese día no Teatro Principal desenvolverase na primeira parte da xornada un debate aberto á participación cidadá no que catro persoas que de maneira altruísta realizan unha intensa laboura de asesoramento e adicación en temas ambientalistas no eido das enerxías chamadas limpas, exporán as súas experiencias sobre o desenvolvemento das industrias deste tipo que están a ser instaladas na natureza.
Deseguido contestarán as dúbidas, preguntas, queixas ou suxestións do público asistente.
Tras unha pausa, na segunda parte da tarde terá lugar a proxección do filme documental “Vidas irrenovables” que leva máis de cen proxeccións por todo o rural do estado. Ao remate o seu director explicará as súas vivencias durante a gravación e como reciben os e as asistentes as testemuñas que se poden ver no filme. De seguido estará dispoñible para cantas ideas e intercambios se susciten.
Título: TRANSICIÓN ECOLÓXICA OU ESPECULACIÓN ENERXÉTICA
Data: Venres, 7 de febreiro de 2025
Lugar: Teatro Principal. Pontevedra
Horario:
16.30 hs Mesa de debate
Rocío Bravo. Bióloga
Bruno Centelles. Instituto de Estudos Miñoráns
Ernesto Romeo. Movimiento Ciudadano Teruel Existe
Almudena Alonso. Avogada
17.30 hs Intervencións do público
18.30 hs Intermedio
19.00 hs Proxección do filme documental “Vidas irrenovables”
20.45 hs Coloquio co director, Francisco J. Vaquero
* A entrada ao Teatro Principal será libre até completar aforo
Breves notas biográficas
Rocío Bravo, bióloga pola Universidade Autónoma de Puebla (México), Doutora pola Universidade de Barcelona, Máster en espazos naturais protexidos (Universidade Autónoma de Madrid). Traballou en conservación de reservas coralinas no Caribe, e agora en cultivo de vide albariña aplicando criterios de sustentabilidade. Colabora en accións de protección da paisaxe e das actividades tradicionais no rural do país.
Bruno Centelles é de Lugo aínda que reside en Nigrán. Licenciado en Filoloxía románica foi mestre de ensino primario dende 1984 até a súa recente xubilación. Especialista en medios audiovisuais e novas tecnoloxías da información. Leva máis de 20 anos como membro das xuntas de goberno do Instituto de Estudos Miñoráns (IEM) e máis da plataforma SOS Serra da Groba. Experto en arte rupestre galego é colaborador habitual das seccións de TIC,s e medios audiovisuais, arqueoloxía, etnografía, medio ambiente e toponimia do IEM.
Nestes últimos anos ven traballando intensamente en contra da “invasión eólica” impulsando, entre outros proxectos, o “Novo paradigma para o estudo dos proxectos eólicos en Galicia” e colaborando con outras organizacións e colectivos, principalmente con “Petón do Lobo” e con “Ecoloxistas Galiza Atlántica e Verde”.
Ernesto Romeo é activista e voceiro do grupo medioambiental do Movimiento Ciudadano Teruel Existe e da coordinadora estatal Aliente (Alianza Energía y Territorio), colectivo de 217 organizacións e centos de persoas individuais unidas para propoñer unha transición enerxética xusta. Profesional da comunicación de dilatada experiencia. Turolense, entusiasta e dinamizador do medio rural e do seu patrimonio.
Almudena Alonso, Graduada en Dereito e ADE, traballou por conta allea para empresas financeiras, actualmente traballa por conta propia como avogada e tamén como profesora no Área de Dereito Mercantil da Universidade da Coruña. Está na quenda de oficio polo que, e debido a que Ecoloxistas Galiza utiliza a xustiza de balde por cuestións de independencia dos actores da sociedade no eido ambiental, levou un recurso contencioso-administrativo diante do Tribunal Superior de Xustiza de Galicia que conseguiu a paralización da tramitación administrativa dun parque eólico polo risco de que cause danos irreparábeis no medio.
Estas catro persoas teñen en común unha alta concienciación da necesidade de protexer a vida no rural, e para iso desenvolven un traballo duro de maneira altruísta aportando os seus coñecementos e experiencia.
Ecoloxistas Galiza organiza esta xornada cun sentido didáctico para que a nosa xente se achegue á problemática que supón un troco do paradigma enerxético, e comprenda a multiplicidade de factores que inciden e incidirán na vida das nosas comunidades nas próximas décadas.
Se quere máis información ou poñerse en contacto con algún das/dos compoñentes da mesa de debate ou do director do filme, o teléfono de contacto é : 722.844.872.